Nuujts

 
Waat is nuuj en waat neet?
 
10 juli 2011

  
Nuuj runj, nuuj kanse. 'T is weer zomer en veer doon weer mit mit de 6 kamp vanne zomerfeeste. Mit ein presensie van 9 man, sjteit sjoon kloote weer veur ein onmeugelikke opgaaf.

Biej sjpel ein woor aaf en toe sjlech te zeen waem deil noom. Ut woor koemelke, echter waem woor de koe? Toon ontpopt zich hiej es eine echte Veehaajer, kins zeen det d'r  dukker zo ein maot inne henj haet. Hiejnao 15 sjeut, neet mitte buks, mer mitte voetbal. Dennis ( Schmitz, neet Bergkamp) sjuut eine keer raak, ein paar angere, sjeete 14 keer mis.
Auch de hindernisbaan moog neet ontbraeke, waorom kump biej oos neemes taege de trap omhoog? Of de trap is te sjlap of de kleutjes te zjwaor. Ich dink det letste. 20 Maeter sjtil sjtaon, Frank sjteit ( sjtil) in ein sjtellage die de sjmeed zelluf inein hat geflans. 4 Kleutjes haaje Frank mit touwe in aevewich en probeere Frank om en om nao veur te kriege mit det sjtuk iezer. Ut lukt.
 
Es letzte wilt Jack dit jaor de prestaasie van Frank veurig jaor verbaetere, of hae haaj honger! De eerste runj euverlaef d'r mer in de tweede runj is toch de zoon van Will, Dean (en nag get vraetzekskes) mit eine grotere honger degene die Jack kloppe.
 

 
22 janewarie 2011
Sjoon Kloote wint 't 22e nachvolleybaltoernooi door inne finale 't team "Iets van Sjmiets" te versjlaon.
 
 
11 November 2010
'T nuuje sezoen is weer geäöpend!! Laot 't wer ein sjentjig, sjoon, fees wäëre.
 
18 Juli
De zomerfeeste sjtaont weer veur de deur en auch dit jaor haet Sjoon Kloote weer mit gedaon aane zis kamp. Ut waer woor sjoon en de prestasies kloote. Mer baeter dit den anges om. Toch zint veer ondanks de magere (individuele) prestasies nog niprt binne de top teen gebleeve. Veer zin t zelfs neegende gewaore. Jonges en maedjes!! Sjpitze Klasse.
Groepsgewies warde alle 6 de sjpelle team veur team aafgewerk. Begos waerde mit balle-knalle. Opdrach woor om zo duk meugelik oet neege sjeut, de bal door ein gaat te sjeete. SK-skoore 0 oet 8!!
Vervolges moch Wouter de eer hooghaaje om zo lang (kort) meugelik aan ein sjpijkerbooks te blieve hange. Ein dink woor zeeker, hae woor es sjnelste weer onger...
Hiejnao volgde ein echte groepsaktiviteit. Waterballonne vange. Eerste zeege veur SK in ein direk gevech mit taegesjpelers, waterballonne en eijer??
Es veerde sjpel waerde veul van os kondisie gevraog. Renne nao eine bak water, eine ping-pong bal mit de mondj droet happe en op aafsjtand in eine bak sjpieje. Es veer Frank neet haaje gehat haaje ver auch hiej nieks op geskoord, mer ja, mitdoon is belangrieker dan sjteeds mer weer winne...
Topsjpel van vandaag woor ut Tobbedanse. De aajste jeug haet zich hiej ut biste kinne vermaake. Blij dat ik glij, van ein ingezeipte helling. Caspar woor nag bes rap woh!
Frank, Abraham en team kapitein, haet zich als vriewilliger opgegaeve veur de 6de en letste runj. Frik-Bikke. Koos merke det d'r de curry, mayo en eutjes miste, want biej 5, hilt d'r op. Mer gein gezeiver, ut woor ein geweldig en sjoon prestasie. Toet volgend jaor biste zis-kampers.
 
16-17-18-19 Februari
Veer daag van sjpass en plezeer in 't Beerbök riek. Zaoterig eers nao kirk om 'toesjtumming' te gaon vraoge om nag ens lekker oet de bandj te sjpringe. En det moch, noe thoes nag....!
Op nao Tönke om de vastelaovindjsaovindj biej te woonen. Aajerwets gezellig mit diverse optraejes, woo-onger de 'oudjes' euver vreuger.
Zonjig, vriejaaf veur SK, echter neet veur de waage bouwers. De letste handj aane waage waerd gesjlaage en oeteindelik is d'r net op tied klaor om...
...Maondig mit te trikke inne 'groote' optoch van Vlorp. Wederom tweede inne categorie waages, ein gooi prolongasie van veurig jaor. Biej Tönke aafgepils om biej de Prins aaf te sjloete mit 'La Bamba'.
Dinsdig, aafbraeke van de zilverre prestasie waage, en daonao sjpooje om op tied veur de kinjermiddig te zin. Weederom eine geweldige daag biej Tönke, mit de aafsjloeting biej Bremmers en rondj 't vastelaovesbeeld. Al mit al ein zeer gesjlaag vastelaovesfees.
 
10 Februari
Op oetneudiging zint veer op bezeuk gegaon biej Bejaarde-/verzorgingstehoes St Jan Baptist inZjwaame. Os woor ter oore gekomme det Ien zien mam, Lien, prinses waerde van St Jan Baptist. En zo get kinse neet langs dich haen laote gaon. Lien haet zichbaar genaote van neet allein os bezeuk, mer auch det van ne Beerbök en Tanzmarietje Ionie.
 
31 December 2009 - 01 Jannewarie 2010
Awt op nuuj jaor waerde dit jaor gevierd biej Harold en Nicole. Of 't ein en anger binne de gewunsjte norme is gebleev, kint geer zeen in het fotoalbum op dees site. Feit is waal det 't ein gewldig sjoon fees gewaore is, waat 't volgend jaor zeeker ein vervolg mot kriege. Harold, Nicole, Anke, hertelik dank veur de gooj zorg.

 

Zaoterdig 19 December
Eindelik, d'r is weer good nuujs van 't kloote front. 'T 21e nach volleybal toernooi moog mit 10 deilnummende teams es get ingetaogener waere betiteld, mer toch. In eine sjportieve mer veural auch winjterse nach, is 't sjoon kloot gelök om zelluf auch 'ns de euverwinning binne te sjleipe. Aaf en toe mos waere aafgezeen, Wil mos zelfs eij uigske d'r biej dichkniepe en Ine haet nag eine vinger inne pap gesjtaoke... Mer de sjtried is gesjtreeje, de wins behaold en de euverwinning binne. Kleutjes Preficiat.
Gonsdig 11 November
De ellefde van de ellefde. Äöpening van 't vastelaoves seizoen. Optoch saame mit de beerbök om oze dors lustige hoogheid op te haole heives. Wonao wiejer wuurde getrokke om de 2 tanz marietjes heives op te haole. Plechtige verplichtinge oppe Platz biej ut waal bekinde beeld waerde mit meziek door oos opgeloesterd, waonao de eerste vastelaoves elikser riekelik haet gevloeid. Offisjeel is 't noe begonne.
Zaoterdig 31 oktober.
Leon haet Abraham gezeen, mer Aabraham Leon nag neet. Dae kluppel is al daag aan ei sjtuk aan 't zeuke. Terwiel d'r de 31 's aoves geweun biej Bremmers waas!
Rondj ein oer af hallef neege zinne veer ESKA mit aanhang in os oefenlokaal beijeingekomme om later (wieveul weit ich neet gans precies mer 't zal ein sjtuk af 2 bit zin gewaes) nao Bremmers te vertrikke wo os bügel wonjer Leon zien klein sjalig opgezatte groot oetgepak feesje gehaaje haet. Binnetrekke mit meziek, om vervolges inkele nummers ten geheure te mooge bringe veur 't feesverke. Dit waerde opgeleuk mit ein zegje van Frank, ESKA's sjpraeksjtalmeister en chinoloog en ein presentje veur de jarige oetgereik door inkele van os dames. Hiejnao, wie kin 't auch anges, sjtruimde 't goude voch riekelik oet 't door jidderein meis gewaardeerde keuke-instrument, de tap! Verzorg mit ein lekker hepke veur de hongerige onger de feesgengers en nog ei tusjetieds geregeld optraeje van ESKA is t'r toet in de kleine uurkes gefees, wonao nag efkes biej Harold en Nicole waerde aafgepils, nao geklesjeneerd en gefees. Al mit al, ein gesjlaag fees, Leon bedank!!! Veer es vastelaoves gekke verwachte mit 5 x 11 weer zoget ; -), dus euver 5 jaor! Laot gaon laot gaon dae waage. 
Wiekend van 26 en 27 september.
Dit keer geine valkoele-flapdrol, mer sjoon kloote diej de heldesse bosse onveilig hubbe gemaak. Allereers begin ich biej ut inj. Organizasie, Liel en Ien, "ut woor ein sjoon kloote wiekend", perfekte organizasie en zeker auch de komplimente veur ut regele van det sjoon nao zoomer waer.
 
Gaon veur wiejer biej ut begin, om ein oer of drie trokke de zeeve musketiers mit de mountenbaik, richting Helje. Jos haaj de route veur ut lets ein jaor of 3 geleeje gefiets, dus hae meinde det ze nag waal in zien routebook sjting.
 
 
  Woo blief Frank?                                                     Ha, dao kump der aan!
Caspar, Dennis, Frank H, Frank K, Jos, Magnus en Wouter zin vertrokke via Venhof euver de zeeve heuvele?, waem haet ze geteldj? richting Helje. Ongerwaeges haet minnigein zich verbaasj euver de sjoonheit van oos landj en auch det van diej Pruusje, det eigelik nag neet veul van oos koste. Euver de nuuje N280 via de Pruusje bosj (wie ze det oppe Boekoel zegge) richting de waeg van Zjwaame nao Brügge. Dwars door ut munisiedepot en langs de witte sjtein (Weisser Stein) nao ut vaer Beesel - Kissel. Auch hiej zoot alles mit (veur hoofde dit keer neet te zjwumme) en mochte mit ut vaer mit nao de euverkantj. Van hiej oet woor ut nag mer ein klein sjtukske toet de Bosgaloos oppe Camping in de Heldesse bosse.
Veur waerde opgewach door de organizasie dames tevens auch ontvangskommitee, biej de 3 door SK gehuurde bosgaloos: Knien, Sjpech en Eiketzke. Ongertusse woor ut al taege zisse en ein good oer later kwoome de naokomers mitte auto en de bagaasj. Per laoterie waerde de bidjes verdeild en koos jidderein zich klaor gaon maake veur de aovindj. Barbekjoe in de nao-zoomer aovindj mit get lekkers te kloeke der biej.
 
 
 
Omdet de meziek dae aovindj eij klein bietje taegeveel, besjloot Jos ziene auto mer es drejtaofel te gebroeke en daomit joog der alle wildj teruuk ut bos in, zeeker es Liel de meziek ging bepaole. Naeve meziek veel der zo noe en den auch nag ein mupke ten geheure, des gewunsj vertaald in ut plat, Pruusj of, ja ja, in ut Zjweeds.
 
 
 
In de laate uurkes wurde ut sjteeds kaajer, mer det moch de pret neet drukke. Ut vleisj en vusj woor wiet op, de kratte wiet laeg en de tesse good vol. In de klein uurkes hubbe de letzte volhaajers heur nesje opgezoch en woor de rus weedergekeerd in de Heldesse bosse.
 
Smorges waerde ut ontbijt gereegeld, vers gehaold oppe fiets en geserveerd in de boeteloch, mit ein lekker tas koffie of tee. Dao waerd jidderein toch waal weer eij bietje ut menke (of vruiwke) biej. Waat toen? Zeker neet onbelangriek, der waerde nuuj beer gehaold en waal mitte waage, want 2 bek mit 2 man... Mer de drejtaofel wou neet meer sjtarte, zeeker te veul noote oppe zank gehad. Nao eine biejsjtart ging expedisie Warsteiner van sjtart.
 
Nao alle hoeshaajelikke dingskes te hubbe aafgerondj woor ut tied om lekker te gaon ploensje in ut euverdikte zjumparadieske. De dames haaje veur oos ein sjoon sjpelprogram in mekaar gezat. Veur waerde verdeild in 3 tiems; Do, Re en jaja Mi.
 
Sjpel 1: Gank mit minimaal 3 leeje van uch tiem op ein zo origineel meugelikke maneer vanne roetsjbaan aaf. De dames woore de jurie en korrespedensie euver de oetsjlaag woor oetgesjlaote.
 
Sjpel 2: Zjwum, zo sjnel meugelik, taege de sjtruim, vanne sjtruimversjnelling inne. En eij geploeter en gekrawwel en geverzoep blub. Neet jidderein haolde ut inj (of ut begin lik der aan van welke kantj se ut bekieks.)
 
Sjpel 3: Estafette mit ut ganse tiem. Euverzjwumme en teruuk in ein zo sjnel meuglikke tied. Eine poet zeij nag taege Ien det der nog nooits gezeen haaj det auch volwassene sjpaas maake kinne. Dae kwoom zeeker auch net pas kieke??
 
Tied veur ein lekker tas soep en get sjtokbrood teruuk aanne bosgaloos.
In de middig sjtinge nag 2 dreug sjpelle op ut program.
 
Sjpel 4: Mit ut pontje zo sjnel meugelik mit hallef ut tiem nao de euverkantj vanne aendjeviever. De anger leeje rende nao de euverkantj woo de wissel plaatsvonj en ut pontje mit de anger helf weer teruuk moos. En oeteraard de eerste helf moos renne veur, jaja, weer eine wissel. Zo waerde 4 baenkes per tiem gemaak, auch weer op tied.
 
Sjpel 5: Ein kompetisie beachvolley, tiem taege tiem, 2 x vief menuute.
 
 
Biej teruukkoms woor der vlaai van de bekker oet Mofert. Dae zit auch wiej gebakke oppe kemping en brach oos dees lekkerniej es sjponsoring (of hae haaj ze euver van de verkaup...)
 
Es aafsjloeter ginge ver te voot nao Helje veur eine lekkere friet en hiejnao ginge de meiste heimes.
 
Om mit ut begin te eindige, Ien, Liel, dit moog ger dukker reegele, der woor geine fehler te bekinne! Top.
 
 
Nao ein deep beraod en zis pils,
is unaniem besjlaote door de ziskampers en toesjouwers oet ut sjoon kloote kamp, det veur ein nuuj lid aan numme:
Marianne Kessels oet Postert geit mit de samba bul sjlaon en is eerste reserf veur Liel, den kin Jack oet blieve blinke op zien nuuj trompet! Marianne welkom.
Verder is oze 'invaller' euvergehaold om vas lid te waere, Teun (Patrick Theunissen) zal de diksels gaon sjlaon!! Auch Teun, welkom!
 
Zondig 26 juli (6-kamp)
Zondig 26 juli geit de beuk in es ein sjoon gezellig en sjportief sjpektakel, allein de sjportieve prestaties kinne nag baeter!
Mit os teental ginge ver de sjtried vanne zeskamp aan. Gestreeje waerde mit ein zeevetal taems in ein zestal sjpelle: Sjpijkerbooks hange, touwtrekke (nae neet tröttetrikke), goalsjeete, knuppele gevech, zeipbaanglije en last but not laest, frikadelle (vr)aete. Ondanks det SK in de ongerste regionen vanne rangliest terech gekome is, petje af veur de kleutjes en kleutinnekes die hubbe mit gedaon, mer auch veur die, die vanne kantj oos hubbe aangemoedig!! Volgend jaor kump der zeeker eine revanche. Beerbök maak uch de bors mer naat!
 
Zondig 7 juni (Kirmes zondig)
Zondig 7 juni haet sjoon kloote offisjeel de nuu truis in ontvangs mooge numme van heure sjponsor "Tuincentrum Daniëls". Sjoon Kloote haet dit sjpektakel zelluf opgeloestert toet genoege van veul bezeukers aan ut tuincentrum. De eine woor get bliejer der mit es de angere, mer al mit al bleeve veul luuj plekke om de sjoon noote te mooge aanheure.
Ein drietal sjpeelsessies, aafgewisseld mit ein flesjke beer en vlaaj van ooze sjponsor, mit tussedoor de offisjeele aangelegenheid hubbe toet eine geweldige middig geleid. Der zin auch fotoos gemaak welke geur teruuk vinjdt inne foto gallerie op oos site.
 
Veur wille Wiel en Marleen oeteraard van herte bedanke veur de werme geste welke ze oos hubbe aangebaoje in de vorm van lekker werm truis. BEDANK!!
 
Nao aafloup van de gezellige middig sjtong der nag meer op ut program. Gezaamelik zindt veur nao de hoeskamer getroch, woo ein van te veure vas gesjteld menu veur oos woor klaor gemaak. Mit eij vol buukske ging de sjtoet toen nao Vlorp woo lekker waerde aafgepils mit get eige meziek biej kafee Bremmers en kafee De Prins. Al mit al eine gesjlaagde daag!!